সেই নাৰীয়ে কি বিচাৰে

জ্যোতিময় দত্ত

সেই নাৰীয়ে কি বিচাৰে
যাৰ বুকুত কলমলাই থাকে অবুজ শিশু এটাই

যাৰ ওচৰলৈ হাজাৰবাৰ ডেউকা কোবাই উৰি
যাব খোজে বালিমাহী চৰাই

দুওঠৰ সুহুৰিত নৈৰ-পাৰলৈ ল’ৰ দিয়ে
ৰাতিৰ জোঁনটোৱে যাক বিচাৰি

যিয়ে পোহৰাই ৰাখে মোৰ দুচকুৰ বাট
সজাই থয় বিচাৰি ফুৰা সপোনময়তা

সেই নাৰীয়ে কি বিচাৰে
যাৰ ওঠৰ কপনিত তিতি থাকে উশাহ

যিয়ে মিচিকিয়া হাহিৰে চঞ্চল কৰে প্ৰৱাহী বতাহ
যাৰ কোচত মূৰ থৈ শুৱে চুলি মেলি মৌনতাই

সেই নাৰীয়ে কি বিচাৰে
যাৰ বাবেই উচুপনিৰ পতাত জ্বলি- জ্বলি
ওলমি থাকে ৰাতিৰ নক্ষত্ৰ