ছাঁ পোহৰৰ খেলা

শান্তনু চাংমাই

ফুলৰ সতে কথা পাতি পাতি আমনি লগা ছোৱালীজনীয়ে প্ৰতিটো ভোমোৰাকে কৈ যায় তাইৰ আকুলতাৰ কথা/ বিচাৰি আনিবলৈ দিয়ে তাইৰ সপোনৰ কোঁৱৰক/

আঙুলিৰ পাবত দিনবোৰ যেন নাযায় নুপুৱায়/ সৰাপাতে ঢাকি ৰাখিব নোৱাৰে সংগীতৰ পূৰঠ সুৰবোৰ/
এপাহ এপাহ কৈ প্ৰতিপাহ ফুলৰ পাপৰি গণি শেষ কৰি পেলাইছে তাই/ তাইতকৈ ধুনীয়া হ’ব খোজা ফুলপাহিক পাতৰ সতে সী পেলাইছে/

কোমল ঘাঁহডৰা নিতৌ গোলাপৰ পাপৰি ছটিয়াই ভাস্কৰ কৰি ৰাখিছে/ বতাহত বিয়পাইছে বচা বচা আতৰৰ সুৰভি/ কোঁৱৰক লৈ কিমান যে জন্পনা/

নেদেখা নুশুনা ছবিখন মনতে আঁকি লৈ তাই উষাৰ পৰা চিত্ৰলেখা হৈছে/
অকণমান ছাঁ পৰিলেই তাই ডবিয়াই মেলি পোহৰৰ ব্যৱস্থা কৰিছে /